أشواق

التقينا
في صدف النهار المذهلة

ذابت بينناالألوان والأنوار
وتبسمات صارت لغة

وإراتدادات الطرف في اضطراب

صارت حوار
صار الطريق يعدو بنا

نحو مدارات وردية

غير لون الحزن فينا

باقتدار
ونسينا فى العيون تساءولات

وتراءى لنا الكون

فقاعات هواء كما الصغار
درنا حوله كفراشات الربيع

تطير ثم تتوسد الأزهار

وفي موسم الرحيل استودعتنى

لليل دثرني بمعطفه

وأمنته على الأسرار

وأهديني نُجيماته

ففردت شعرى على السماء

وأسندت رأسي إلى الأقمار

وأتى الصباح
وصباحات عديدة

فلا أتيت
ولا أتتنى من أخبار

مازلت انتظرك
في شرفات الحلم العالية

معى أنفاسك .. عطرك

هداياك .. كلماتك

بقايانا

أغزلها أشعار

معي حلمى وقلبي

وأطياف عيناك فى السحابات
تشارك عينيّ الأسهار

مازال الليل ينتظرك معي

وسأنتظرك حتى وإن

أفنيت العمر في الانتظار

لو قال

لو قال : أنا مهري السهر
عمري السهر
لو قال
لو قال : أنا قلبي وتر
أنا قلبي له موال
لو قال يا ناس لو قال
هايرقص الموال
ويفرحنا ويريحنا
م الغرية والرتحال
---
الاغنية دى بتاعة عمرو دياب
نزلت فى البوم خالصين
سنة 1987
ياااااااااه
من ساعتها مش ناسياها بجد الاغنية جميلة فعلا
بجد عمرو عمل اغانى لو عمل ايه مش هايعرف يعمل زيها تانى
ربنا يهديه ... كان بجد مغنى كويس
دلوقتى بيقول اى كلام فى اي حتة والناس بتسمعه
انا برده بسمع عمرو دياب
بس القديم

الاغنية هنا

اروح أعمل كارنيه حزب وطنى وأخلص؟

قامت الحكومة المصرية فى الايام الاخيرة بدور اشبه بدور " البيلياتشو السخيف" في عرض مستمر؛ لا نهائي على ما يبدو تؤديه على مصر مصر الحرة (اسميا لا فعليا) قامت بعرض سخيف .. عرض قام تأليفه واخراجه وانتاجه .. ما يسمى بفرقة الحزب الوطنى لألاعيب الحكومة البهلاونية .. اهبش واجرى؛ وفَرِق تَسُد؛ وجَوّع الناس تكون سيدهم .. ولكنها لم تسمع من قبل تلك الحكومة الصماء عن أمثال "اطعم الفم تستحى العين" بل انها كلما وجدت لقمة فى الفم انتزعتها انتزاعا ثم تلقى فى النيل بأجولة من الحبوب المنومة ليظل الجمهور المسكين نائما فى العسل .. وهو ليس عسلا بالطبع هو فى الغالب " طفح مجارى" ليس أكثر
ذلك العرض الرائ عالذي لا يُضحك أحدا سوى الحكومة؛ ينافس فى مأساويته وحبكاته وتعقيداته اللانهائية روايات ديكنز التي طالما سببت لى بؤسا واكتئابا فى مرحلة مراهقتى .. لم أدرك أنني حين أخرج للعالم الاكبر سأواجه مصيرا أبشع من ديكنز وأبطاله .. نعم أقولها الآن ليتنى كنت بطلا من أبطال تلك الروايات ولم أعش يوما مهانة على أرضي .. أنا وأهلها جميعا .. وينهل من خيرها شرذمة من الاغبياء .. كان من الممكن تفادي المأساة وننعم فى رغد العيش جميعا نحن وهم .. لو كانوا يعقلون .. ولكن من أين يأتى العقل لقوم أضل من الأنعام مصرون على ارتداء قناع الغباء واحد ويكنون الولاء لقائد القطيع الضال السائر بهم نحو الهاوية ولا مفر.
فليقل لى أحد .. أنا التى ولدت فى هذا الذل وأمضيت عمرى كاملا في هذا العرض السخيف .. أمضيته طفولة ومراهقة .. وها قد شارف شبابي على الانتهاء ومازال العرض مستمرا .. والدخول إجبارى؛ والدفع أيضا اجبارى.. إما الحضور وإما الموت
والجمهور لا يعترض .. يشاهد ويشارك .. مكتوف الأيدي مكمم الأفواه
الجميع مكبل بقيود العوز والحاجة .. الجميع متكالب على فتات الطعام التى تلقي إليه
حاوت الصراخ ولكن ها القيود مرة اخرى
من يجروء على الاعتراض .. من يعترض يلقى مصيره بين أنياب كائنات مفترسة تعشق اللحم البشري وتلتهمه بنهم شديد
بكينت أنهارا عندا صدر القرار بتعدي الدستور المادة 76 من الدستور المصري وأعلنتها فى الفضاء الالكترونى .. وفاة مصر؛ بل وتقبلت فيها العزاء؛ وبكيت في مسرحية انتخاب الرئيس الهزلية التى ساهمت بجانب كل ما يحدث لنا هذه الأيام فى اصابتى بأمراض العصر المعروفة الضغط والقاولون العصبي ولكنى لم أتأكد من أصابتى كمعظم المصريين بفيرس سي أو بمرض السكري ولكن أظنهما فى الطريق
وظننت بعد أن توالت الأحداث واعترض جانب من الحضور على ما يحدث وكنت منهم .. ولكن كممت الأفواه ومات من مات ولم أعد أكترث لمحاكمات محسومة مسبقا مثل الحكم على ابراهيم عيسي او تبرئة هاني سرور
حتى أتانا الملك العظيم السلطان .. بعلاوة 30% قُبيل عيد ميلاده
وكل سنة والشعب طافح الكوتة (إذا وجدت) واليوم التالى وبعد الفشل النسبي للاضراب رفعت الحكومة الأسعار مستهزئة بالمعارضين من كافة الفئات وليخبط الشعب راسه فى اتخن حيطة وانا منهم أيضا
حقا فقدت قدرتى على التفاؤل .. فليجبنى أحد
هل من أمل فى إصلاح هذه البلد المايلة .. أم لا مفر من الاستسلام وأرتدى قناعا بلاستيكيا على وجهى وعقلى كما فعل الكثير وأروح أعمل كارنيه حزب وطنى وأخلص ؟؟؟

انت مش ابن بهية

في تحليل شخصي بحت .. تفتق عنه ذهني الصغير لفيلم (هي فوضي) ان بهية هى مصر وان ابنتها نور هى الشعب الغلبان المكسور المغلوب على أمره والذي يتطلع بدوره لسلطة القضاء والنيابة وكل الناس اللى درست حقوق ( الشرفا بس مش النص نص) علشان يحميه ويساعده ويقف جنبه وطبعا فهمتوا ان اكيد امين الشرطة دة يبقى السلطة التنفيذية .. لأ على فكرة مش السلطة التنفيذية بس دة الحكومة كلها .. دة كان تحليل بسيط ومحدش يحرجنى ولا يتريق عليا

نيجى بقى لباقي الكلام اللى مالوش دعوة باللى فوق بس هاتفهموا فى الاخر

.....

امبارح ذهلت وصدمت من ايميل جالى عن رفع اسعار كل حاجة واى حاجة فى اى حتة علشان يحصلوا العلاوة الـ 30% اللى قال عليها بسلامته الغالى بن الغاليين

بس انا مفهتمش.. حاجة واحدة كان نفسي سعادة معالى ( معرفش ليه معالى انما هي بتتقال كدة) يوسف باشا بطرس غالى يفهمهالى وهو كان قاعد مع "طمّورة" المذيع الوسيم ( مشيها الوسيم) المستأسد الشملول اللى شايل البيت لوحده كنس وتنضيف وغسيل علشان ينضف صورة الحكومة وبرده مش عارف

الحاجة دى اللى هى ايه من غير ما اتوهكم .. الريس ادا علاوة باليمين واصدر اوامره ان الحكومة تاخدها بالشمال وبالمرة تشوطنا برجليها كام شلوت "دفعة للامام" .. الله يخرب عقلكوا اكتر ما هو مخروب .. كام واحد بيشتغل فى الحكومة المخروبة دى؟ وكام واحد هاياخد العلاوة وكام واحد غلبان زيي وبيشتغل قطاع خاص وطلعان عينه علشان المرتب يزيد وصاحب العمل يا اما معندوش امكانية لأنه مش قادر ينافس فى السوق ( علشان فيه حيتان ) يا اما مش عايز يدفع وخلاص لأن الحكومة مقلباه فى ضرايب قد كدة وهو مش فاتح الشركة سبيل ام العواجز يعنى .. دى سبوبة برده .. امال يروح مارينا ولا حتى يصيف في عين الصيرة ازاى؟

حد يفهمنى بدل ما اتنقط ويجيلى سكتة قلبيه

وحياة ربنا نايمة بالليل باحلم انى نزلت وقفت تحت صباع ابراهيم باشا وقعدت اصرخ واقول الله يحرقوا حكومة .. جتكم القرف .. نعمل ايه يعنى

نموت ولا نموت نفسنا

وطبعا حتى فى الحلم الواحد مش عارف يفضفض .. جم الامن المركزي اللطيف وحطونى فى البوكس الخفيف وطيران على مكان .. لا اسم له ولا عنوان ولا يعرفه انس ولا جان .. صراحة خفت على امى يجرى لها حاجة ولولا كدة كنت عملتها

بالنسبة بقى لابن بهية

اى واحد من الشعب

اللى هما من ضمنهم الحكومة برده

بس دول بقى مش ولاد بهية

وانا عاملة البوست دة علشان ابلغكم انكم كلكم ( والكام للحكومة) مش ولاد بهية

بهية متبرية منكم ليوم الدين

الا من تاب واناب وعمل عملا صالحا يريح ولاد بهية

وانت بالذات

ايوة متبصش حواليك وتستعبط انت انت يابو دماغ قد البطيخة بس فاضية من جوة

انت بالذات بقى بهية بتدعى عليك ليل نهار .. ربنا يهدك يا بعيد

روح انت مش ابن بهية ولا بهية تعرفك

( الموضوع مكتوب بالاسود علشان السواد اللى احنا شايفينه ومفيش صور كمان )

حكم 4

حكم 3

حكم2

حكم

براءة

إظلام

ذنبه فى رقبتى ورقبتنا كلنا

الولد دة صورته من الاتوبيس الساعة 8 الصبح وانا رايحة الشغل

الولد دة راكب على عربية نقل انا كان نفسي اصور المنظر كله بس معرفتش اجيب الزاوية احسن من كدة علشان برده متقيدة بمكانى ومش عايزة الفت النظر احسن اتضرب

الولد دة عمره حوالى 10 سنين

راكب فى العربية من ورا اللى واضح جدا انه بشتغل عليها تباع

الولد دة مكانه مش هنا

مكانه فى المدرسة

مش متخيلاه سايب المكان اللى المفروض يكون فيه وبشتغل

عارفة ان ظروفه قد تكون صعبة .. ابوه متوفى ولا طفشاناو اهله مش متعلمين ومش عارفين اهمية ان الواحد على الاقل يقرا ويكتب( يفك الخط زى ما بيقولوا) بس بجد قلبى وجعنى اوى

بس لما فكرت

لقيت ان كلنا مسئولين عنه وعن كل اللى زيه

يارب حاسبنا برحمتك مش بعدلك

عربي

على باب محطة مترو حدايق المعادي
هو إحنا هانتعلم عربي امتى؟

من ألف عام وأنا عايش فى الزمان الجي

فى طفولتى .. لست أذكر فى أى عام من دراستي الأساسية ( مع التحفظ على أساسية دى انما ما علينا) درست قصيدة للشاعرة فدوى طوقان .. تلك الجميلة صاحبة أرق كلمات لشاعرة قرأتها فى حياتى كلها حتى الآن .. والدليل أهو .. احفظ قصيدة درستها فى الابتدائي ولم تكن من "المحفوظات" ومع ذلك لأنها مستنى حفظتها .. كانت تقول :

يا مصر، حلم ساحر الألوان رافق كل عمري

كم داعبت روحي رؤاه فرفّ روحي خلف صدري

حلم كظل الواحة الخضراء في صحراء قفر

أن اجتلي هذا الحمى، واضمه قلباً وعين

واليوم، في حلم أنا، أم يقظةٍ، أم بين بين؟

صدحت بقلبي إذ وطئت ثراك أنغامٌ سواحر

فكأنما في قلبي المأخوذ غنّى الف طائر

وغرقت في أمواج إحساسٍ بعيد الغور فائر

أأنا هنا ؟ في مصر، في الوادي النبيل ؟

أأنا هنا في النيل، في الأهرام، في ظل النخيل؟

كيف اتجهت تجاوبٌ وصدىً لموسيقى الوجود

في النيل يعزف لحنة الأبدي للشط السعيد

في وشوشات النسمة المعطار، في النخل الميود

حتى النجوم هنا أحسّ لهنّ الحاناً شجيّه

حتى السحاب أخاله تحدوه موسيقى خفيّه

يا ليتني يا مصر نجم في سمائك يخفق

يا ليتني في نيلك الأزليّ موجٌ يدفق

يا ليتني لغزٌ، أبو الهول احتواه، مغلق

تهوى وتنسق الدهور مواكباً، وأنا هنا

بعض خفيٌ من كيانك لست أدرك ما أنا !!

(لقراءة القصيدة كاملة .. اضغط هنا)

طبعا هذه ليست كل القصيدة وإلا كان زمان باقول على نفسي حمارة وكنت كرهت الشعر والشعرا واللى عايز يدرس شعر، لأن القصيدة بحق مليئة بالصور العذبة التى تجعل القارىء يفكر هى الست دى كانت شاربة ايه لما زارت مصر وكتبتها؟

والآن ما سبق هو تخيلى عن مصر

---

مصر التى فى خاطري

راحت خلاص وراحت أيامها

مصر النهاردة باعت النيل والهرم

باعت عيالها وباعت هدومها

مصر التى فى خاطري

كسرت بخاطري

اترحموا عليها وعليها

اصبغوا الايام بالدم الاحمر

وسيبوا بس اللون الاسود فوق علمها

----

جميع الحقوق محفوظة لصاحبة المدونة

متشكرين

يا عجايبك يا مصر

هو فيه مقهى عمومي ومقهى خصوصى؟؟؟؟

فيكى العجب يا مصر

غزة .. ابكي على كتفي

This belongs to StudioBendib and are protected under U.S. copyright laws

الـبــــــــــــــقرة !!! ليست صفراء

بما إن الواحد عنده مرارة واحدة ودفاعا عن تلك المرارة الواحدة قلت لازم افضفض هنا شوية، الصورة اللى فوق دى ومعاها صورة تانية جولى على الميل ومكتوب عليهم ان دول نموذج للبقرة التى ورد ذكرها فى سورة البقرة...

بسم الله الرحمن الرحيم:

( قالوا ادع لنا ربك يبين لنا ما لونها قال إنه يقول إنها بقرة صفراء فاقع لونها تسر الناظرين)

لحد هنا وجميل؟ .. لا مش جميل

إحساسي الجرافيكى الخبيث ألهمنى انى أكبر الصورة وادقق فيها

واااا أسفاه

طلع إحساسي الجرافيكى مظبوط

الصورة طلعت متفبركة .. آه والله ..

إن شالله أعدم نواضري بدري بدري

اللى يكبر الصورة هايلاقى خط غامق كدة حوالين البقرة

فدة بقى معناه ان الحلو اللى افتكس الميل دة اصلا

جاب صورة البقرة الحلوب الحلوة دى وراح " مسلك عليها"

- يعنى عامل selection-

وراح ضاربها اصفر يا معلمين

وراح باعتها لشوية ناس او رفعها على منتدى

طبعا بعد ما خففها خالص مما ادى إلى ان جودتها قلت فا كمان ملاحظة الفبركة قلت

شوف إزاي

نقوم احنا بمنتهى السذاجة نبعتها لبعض

والنبي يا جماعة شوف الناس بيضحكوا علينا ازاى

واحنا بنصدق على طول

اصلا حتى لو دى يعنى بقرة صفراء

احنا هانستفيد ايه؟

علم لا ينفع وجهل لا يضر

ربنا قال ان كان فيه بقرة صفرا

يبقى كان فيه بقرة صفرا

ما من شك ..

يبقى الكلام دة مالوش لزوم اصلا

يلا ما علينا

انا بص قلت افضفض

عن مدونتي

غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... و ليــــــــه
رسمت ورده وبيت و قلب و علـــــــــــم

عجبي !!!

مدونتي ..

ليست هذه أول تجربة لي فى عالم التدوين والمدونين .. ولكن تبعا للتغيرات التى تطرأ على الانسان فقد قررت إعادة رسم مدونتى وآثرت البدأ من جديد متبعة خطا مخالفا لما كنت عليه من قبل .. أما عن اسمها فهو استعارة من إبداع الفنان الشامل .. عملاق الشعر العامي ومبدع الكاريكاتور " عمي وعم المصريين كلهم ... صلاح جاهين" إذ اننى وجدت أن كلامي كله فى الاخر هايطلع كلام مخابيل .. حد ياخد على كلام المخابيل؟؟