6.5.08

انت مش ابن بهية

في تحليل شخصي بحت .. تفتق عنه ذهني الصغير لفيلم (هي فوضي) ان بهية هى مصر وان ابنتها نور هى الشعب الغلبان المكسور المغلوب على أمره والذي يتطلع بدوره لسلطة القضاء والنيابة وكل الناس اللى درست حقوق ( الشرفا بس مش النص نص) علشان يحميه ويساعده ويقف جنبه وطبعا فهمتوا ان اكيد امين الشرطة دة يبقى السلطة التنفيذية .. لأ على فكرة مش السلطة التنفيذية بس دة الحكومة كلها .. دة كان تحليل بسيط ومحدش يحرجنى ولا يتريق عليا
نيجى بقى لباقي الكلام اللى مالوش دعوة باللى فوق بس هاتفهموا فى الاخر
.....
امبارح ذهلت وصدمت من ايميل جالى عن رفع اسعار كل حاجة واى حاجة فى اى حتة علشان يحصلوا العلاوة الـ 30% اللى قال عليها بسلامته الغالى بن الغاليين
بس انا مفهتمش.. حاجة واحدة كان نفسي سعادة معالى ( معرفش ليه معالى انما هي بتتقال كدة) يوسف باشا بطرس غالى يفهمهالى وهو كان قاعد مع "طمّورة" المذيع الوسيم ( مشيها الوسيم) المستأسد الشملول اللى شايل البيت لوحده كنس وتنضيف وغسيل علشان ينضف صورة الحكومة وبرده مش عارف
الحاجة دى اللى هى ايه من غير ما اتوهكم .. الريس ادا علاوة باليمين واصدر اوامره ان الحكومة تاخدها بالشمال وبالمرة تشوطنا برجليها كام شلوت "دفعة للامام" .. الله يخرب عقلكوا اكتر ما هو مخروب .. كام واحد بيشتغل فى الحكومة المخروبة دى؟ وكام واحد هاياخد العلاوة وكام واحد غلبان زيي وبيشتغل قطاع خاص وطلعان عينه علشان المرتب يزيد وصاحب العمل يا اما معندوش امكانية لأنه مش قادر ينافس فى السوق ( علشان فيه حيتان ) يا اما مش عايز يدفع وخلاص لأن الحكومة مقلباه فى ضرايب قد كدة وهو مش فاتح الشركة سبيل ام العواجز يعنى .. دى سبوبة برده .. امال يروح مارينا ولا حتى يصيف في عين الصيرة ازاى؟
حد يفهمنى بدل ما اتنقط ويجيلى سكتة قلبيه
وحياة ربنا نايمة بالليل باحلم انى نزلت وقفت تحت صباع ابراهيم باشا وقعدت اصرخ واقول الله يحرقوا حكومة .. جتكم القرف .. نعمل ايه يعنى
نموت ولا نموت نفسنا
وطبعا حتى فى الحلم الواحد مش عارف يفضفض .. جم الامن المركزي اللطيف وحطونى فى البوكس الخفيف وطيران على مكان .. لا اسم له ولا عنوان ولا يعرفه انس ولا جان .. صراحة خفت على امى يجرى لها حاجة ولولا كدة كنت عملتها
بالنسبة بقى لابن بهية
اى واحد من الشعب
اللى هما من ضمنهم الحكومة برده
بس دول بقى مش ولاد بهية
وانا عاملة البوست دة علشان ابلغكم انكم كلكم ( والكام للحكومة) مش ولاد بهية
بهية متبرية منكم ليوم الدين
الا من تاب واناب وعمل عملا صالحا يريح ولاد بهية
وانت بالذات
ايوة متبصش حواليك وتستعبط انت انت يابو دماغ قد البطيخة بس فاضية من جوة
انت بالذات بقى بهية بتدعى عليك ليل نهار .. ربنا يهدك يا بعيد
روح انت مش ابن بهية ولا بهية تعرفك
( الموضوع مكتوب بالاسود علشان السواد اللى احنا شايفينه ومفيش صور كمان )

No comments: